Mae becws Peter’s o Gaerffili wedi lansio ystod newydd o Roliau Epig a gefnogir gan brofion y synhwyrau a ddarperir drwy Brosiect HELIX, a ariennir gan Lywodraeth Cymru.

Mae Prosiect HELIX, sy’n cael ei ddarparu gan dair canolfan fwyd ledled Cymru sy’n rhan o Arloesi Bwyd Cymru, yn darparu cymorth technegol a masnachol wedi’i ariannu i gwmnïau bwyd a diod o Gymru.

Cysylltodd Peter’s â Chanolfan Diwydiant Bwyd ZERO2FIVE ym Mhrifysgol Metropolitan Caerdydd am gymorth gydag ymchwil defnyddwyr annibynnol, pan oeddent yn y broses o ddatblygu eu dewis byrbrydau newydd arloesol. Mae Rholiau Epig wedi’u cynllunio i ddenu siopwyr iau i’r categori rholiau selsig gyda bwyd cyflym a blasau’r byd fel Byrger Caws, Cyw Iâr Lip Lickin a Chig Mochyn Grefi a BBQ Myglyd.

Gan gyfuno eu gwybodaeth mewn datblygu cynnyrch newydd a phrofi synhwyraidd, cynhaliodd ZERO2FIVE ddau grŵp ffocws defnyddwyr yn gwerthuso siopa rholiau selsig ac arferion bwyta; cysyniad y Rholiau Epig a’i hapêl i wahanol ddemograffeg; ac adborth ar ymddangosiad, blas, gwead ac arogl cynnyrch. Ers hynny mae ZERO2FIVE wedi darparu hyfforddiant synhwyraidd pwrpasol i Peter’s ar gyfer eu panel blasu mewnol, sy’n gwerthuso ystodau cynnyrch newydd a phresennol yn rheolaidd.

Roedd adborth defnyddwyr ar gyfer yr ystod Rholiau Epig yn gadarnhaol iawn gydag 85% o gyfranogwyr y grwpiau ffocws wedi mynegi diddordeb mewn prynu’r cynnyrch. Yn dilyn llwyddiant yr ymchwil, enillodd Peter’s restrau cenedlaethol ar gyfer Rholiau Epig a lansiwyd yn gyfan gwbl ar draws holl siopau Iceland a Food Warehouse ym mis Awst cyn bod ar gael mewn manwerthwyr eraill ym mis Medi.

Meddai Owain Jones, Rheolwr Brand, Rholiau Epig yn Peter’s:

“Roedd ymchwil ZERO2FIVE yn amlwg yn cefnogi datblygiad yr ystod o gynnyrch ac wedi rhoi’r hyder i ni wthio ymlaen i ddod â’n chwyldro rholiau i’r categori. Roeddem hefyd yn gallu defnyddio canfyddiadau’r ymchwil wrth gyflwyno i fanwerthwyr, ac roedden nhw wir yn gwerthfawrogi’r mewnwelediad annibynnol a’r adborth.”

Dywedodd yr Athro David Lloyd, Cyfarwyddwr Canolfan Diwydiant Bwyd ZERO2FIVE:

“Wrth lansio cynnyrch bwyd a diod newydd, mae’n hanfodol deall pwy yw’ch defnyddiwr targed ac a yw’r cysyniad yn apelio atynt. Drwy Brosiect HELIX, rydym yn cynnig amrywiaeth o gymorth datblygu cynnyrch newydd o fewnwelediad i’r farchnad a datblygu ryseitiau i brofion y synhwyrau a dilysu coginio. Rydym yn annog cynhyrchwyr bwyd a diod o Gymru i gysylltu â ni i drafod y cymorth sydd ar gael iddynt a ariennir gan Lywodraeth Cymru.”